Reality Check: How Much More Can We Take?
This past week don open our eyes again, to the ripple effect of failed leadership. Na we dey feel am:
- The pain from police brutality.
- The suffering from broken promises.
- The fear we dey live with every day because of insecurity.
- The total neglect from those wey suppose protect us.
We no dey safe inside house. We no dey safe outside. For road, for market, for hospital, even for school, fear dey everywhere. And yet, we dey try manage, dey adapt, dey keep quiet. But ask yourself how long we go endure?
Make we no deceive ourselves, this wahala go continue as long as we keep quiet and dey adapt to pain like say na normal life.
The good people of Nigeria go just dey pushed to the wall.
So we ask:
- When we go talk?
- Where exactly we dey draw the line?
- How we wan define the "limit"?
- Or na when death don knock, na that time we go wake?
Peace no be just absence of war. Peace na when people no dey live in fear.
– CYCN
We dey live in fear every day:
- Fear of stray bullet from uniform wey suppose protect.
- Fear say one day, na your turn to be kidnapped.
- Fear of false accusation wey fit land you for jail.
- Fear of dying for accident wey good roads for prevent.
- Fear say hospital go reject you because dem no get equipment.
- Fear of hunger, joblessness, and hopelessness wey leadership don create.
This kain fear full everywhere. E don choke our hearts. Nigerians dey bleed in silence. But silence dey kill pass bullet.
Na why we dey talk am now, no keep quiet.
Speak Up. Make CYCN be your voice.
Join the movement wey dey fight for true peace, the kain peace wey come from justice, truth, and leadership wey get sense. No be the fake peace of “make I just survive”, but the real one wey allow people live with dignity.
This country no go change by magic. E go change by action. And action start with voice.
If the people wey suffer no speak, the people wey cause the suffering go think say dem dey do well.
– Tunji Ojolowo (Horain)
Be part of the cure to this disease, the disease of failed leadership, oppression, and lack of accountability.
This na movement, no be one-man voice. We need your strength. We need your courage. We need your truth. We need YOU.
For your peace and that of the generations wey dey come, no dull.
Be like the Edo youth wey don talk. Be part of CYCN.
The time to speak is now. The time to act is now. The time to rise is now.